დავით სარაჯიშვილი

გაზეთ „ივერიას“ 1891 წლის 28 სექტემბრის ნომერში, გამოქვეყნდა ცნობა, რომელიც სოფელ დიღომში, სკოლის გამართვის უშედეგო მცდელობებს და განათლების მიღების კუთხით არსებულ პრობლემებს ეხებოდა:

„დიღომი: დიდი ხანია ვლაპარაკობთ სკოლის გამართვაზე, მაგრამ ჯერ ვერაფერი მოგვიხერხებია. სირცხვილია, სხვა რომ არა იყოს-რა: სამას კომლზე მეტი მცხოვრებელია ჩვენს სოფელში და არა თუ ორ-კლასიანი, ან ერთ-კლასიანი სახელმწიფო სასწავლებელი, სამრევლო სკოლაც კი ვერ გაგვიმართავს.

კიდევ კარგი, რომ ერთი ახალგაზდა სწავლა-მიღებული ქალი (დ. ჭეიძე) თითო-ოროლა ყმაწვილს ასწავლის შინაურულად, თორემ, თქვენი მტერი, ერთი ყმაწვილიც არ გვეყოლებოდა წერა-კითხვის მცოდნე.“

მომდევნო დღეს, 29 სექტემბერს, ამავე გაზეთში ვკითხულობთ:

„როგორც შევიტყეთ, ბ-ნ დ.ზ. სარაჯიშვილის ხარჯით „წერა-კითხვის გამავრცელებელი საზოგადოება“ პირველ-დაწყებითს სასწავლებელს აარსებს სოფ. დიღომში“.